BnSamy

بعتذر لوجود مستجدات، الايف هيكون بكره ان شاء الله... واهو ندي نفسنا فرصة نشوف كل التصريحات والتعليقات ونفهم شوية

بنتي صاحية بتجهز للمدرسة فبقولها (الحلوة دي قامت تعجن في الفجرية، والديك بيدن كوكو كوكو) فقالت لي ايه يا بابا اللي بتقوله دا. فقولت لمراتي هي متعرفش الاغنية دي قالت لا طبعاً دي جيل ألفا ميعرفوش.

*️⃣ ثواني بس هي الأغنية دي كانت بتاعتنا ك جيل الألفية (Millennials) ولا الجيل اللي قبلنا (جيل X) ولا جيل أهلنا اللي قبله جيل الطفرة (Baby boomers) ولا الجيل اللي قبله الجيل الصامت (Silent Generation) اللي بمناسبة جدي الله يرحمه كان مولود في اول سنة في الجيل دا ومعاه برضك حسني مبارك والشيخ طنطاوي (ومعاهم الخنزير شارون) كلهم نفس السنة 1928....

*️⃣ المهم يعني الاغنية دي من الجيل السابق ليه، غناها سيد درويش سنة 1920 يعني من 107 سنة، وقت ما غنى الاغنية دي كان عبد الناصر والسادات عندهم 2 سنة لسه مفطومين 😂... فدي مش أغنية من جيلنا عشان نعرفها احنا، دي اغنية من 1920 السنة اللي اتولد فيها الملك فاروق 😂.

*️⃣ حاسس ان جيلنا هيكون آخر جيل فاكر الحاجات القديمة دي.

أنا عمري في حياتي ما كنت مسحول ومشغول زي حاليا وآخر شهر، فعلى مدار شهور طويلة كنت عايش Low Power بسبب حوار مشكلة النوم Sleep apnea فكانت طاقتي القليلة مخلياني شغال بالحد الأدنى، وبحاول أوازن اللي أقدر أعمله بأقل طاقة ممكنة.

*️⃣ لغاية من شهر لما بدأت مع Bi-PAP حسيت اني فجأة اتشحنت فهنا الحماس أخدني، فتح يا ابني كل اللي حصل الشهور الماضية، هاتلي كل شيء اتأجل، افتح كل الأفكار اللي حطتها في الدرافت ومقبرة الأفكار بتاعتي في تليجرام Saved، وريني يا ابني كل شيء اتعلمته آخر سنتين في Ai وكنت مش لاقي طاقة أنفذه.

*️⃣ فجأة لقيت جبال شغل فتحتها على نفسي، غرقت فيها بشكل مهول، بقيت مش لاقي وقت للحياة 😭 وكان في أيام بروح الشغل 8 ص وأمشي 9 م يعني 13 ساعة قاعد عالمكتب... والمشكلة في القاعدة الكلاسيكية هي إن الشغل بيجيب شغل، أخلص دي يطلع لي دي... واغرق أكثر في الشغل لدرجة سبت قناة اليوتيوب ماتت وبقالي شهرين منزلتش غير 3 او 4 فيديوهات، ويستمر الغرق وحتى هوايتي المفضلة الكتابة بقالي 10 أيام مكتبتش حاجة.

*️⃣ السحلة لا تنتهي، التاسكات خلصت كثير بس الجدول فيه أكثر كإنك بتسحب من بحر، عندي في الواتس آب 98 محادثة Unread غير عشرات في الماسنجر... كل دا وإيه؟ وأنا بستخدم Ai بشكل كثيف وحتى Dot الجديد بتاع ChatGPT مشغله يتابع لي حاجات منها الإيميلات.

*️⃣ عاوز أفصل وأنام وأبص في السقف وأطبق مقولة (ما أعظم ألا تفعل أي شيء، ثم ترتاح) 😂😂 ، انا فتحت على نفسي فتحة كبيرة، حالة الفوقان عملت لي ما يشبه وهم القوة، أنا فايق ادوني تاسكات، أدوني سلاح وأنا هشيل... 😭😭😭... عامة أنا لقطت وقت صورت 2 فيديو ورا بعض وطلعت 2 قدامي كانتوا اتصوروا بدون مونتاج وهنشرهم الايام القادمة ونحاول نرجع تاني للحياة

تم إضافة وظيفة جديدة للوظائف المطلوبة في دكان تك وهي محاسب حديث التخرج وهتلاقوا لينك التقديم ويعتبر "ميني أنترفيو"... وبعتذر للناس اللي قدمت قبل كده وكان في خطأ بيخليهم يظهر لهم إنهم غير مقبولين بالرغم من إن الإجابات سليمة؛ كان في خطأ بالفورم وتم إصلاحة.

وبما إني بن سامي مش بتعامل معاكم ك جمهور وأنا ببعت وظائف والجو دا ونظام أنا ديمقراطي وحر وأجي على نفسي واقلب دكتاتوري فقررت أرد عالتعليقات اللي تكررت في البوست السابق واللي غالباً بيقولها اللي البوست مش ليه من منطلق نغلس على بن سامي.

⬅️1️⃣ ليه بتطلب حديث تخرج بس؟

*️⃣ الإجابة هي إني الوظائف هي مناسبة لحديث التخرج؛ مش محتاج شخص خبرة؛ وحتى الراتب برضك نفسه مش دا الراتب اللي يقبله شخص خبره... فخلينا منطقيين يعني...

⬅️2️⃣ طالما جبت سيرة الراتب يا دكتاتوري ليه بتقول 7000 جنية؟

*️⃣ أولاً في دكان تك لما بنقول راتب فهو صافي... مش بنعمل زي الدولة تقولك رقم بس بخط رفيع يقولك قبل الضرائب والتأمينات والمعاشات ومش عارف ايه فتلاقي نفسك ال 8 الاف بتاعة الدولة مش بتجيب أصلاً ال 7 آلاف.

*️⃣ ثانياً حديث التخرج أنتا بتعينه متعرفش هو مستواه ايه واخطاءه هتكلفك كام؛ هو بيتعلم بباقي مرتبه يعني... شايفه ياخد كام؟ 10 آلاف... أوكي موافق بس مقابل ايه... أنتا فاهم غلط الشركات معندهاش مانع ترفع بس انتا اديني أماره؛ أنا في ناس عندي لسه مكملوش سنتين وراتبهم زاد 100% لإثبات الكفاءة.. عاوز 10 الاف عاوز 15 آلاف عاوز 20 ألف موافق بس هتديني ايه مقابلهم؟ الشركات مش بتدفع مرتب مقابل إن وضع البلد وحش والتضخم والناس تعيش إزاي بالمرتب دا... الشركات بتدفع مقابل أداء... أديني أداء هديك مرتب... فإنتا جديد فأنا معرفكش؛ اثبت كفاءة وعادي جداً ممكن ال 7 يبقى 10 و 12 ألف في سنة عادي... بس وريني مقابل.

⬅️3️⃣ ليه بترفض اللي ساكن بعيد؟ افرض يا سيدي هو موافق ليه ترفضه؟

*️⃣ الراتب بتاعك هو راتب شخص مبتدأ فمش هو الراتب الخرافي اللي مش هتلاقيه بسهولة... فلما تاخد فوق الساعة في الطريق رايح وزيهم راجع... حماس البدايات هيشتغل وهتروح بس شوية تذهب السكرة وتأتي الفكرة فتفرهد وتبدأ تقول طيب مينفعش اشتغل من البيت طيب أصل المرتب مش مناسب ليا أصلي بصرفه مواصلات (وعنده حق) أصل يومي بيضيع ومش بعرف أعمل شيء (وبرضك عنده حق)... جربنا كثير قوي نعين ناس ساكنه بعيد ومش بيعدي 3 شهور ونبدأ الشكوى والتأخر.

⬅️4️⃣ ليه بتقول أول 3 شهور يقبض 7 آلاف ثم بعدها يقبض 6 آلاف + 3 بونص؟ هو مش كده مرتبه قل؟

*️⃣ لإن أول 3 شهور أنتا لسه بتتدرب فلسه بتغلط وبتتعلم فمفيش حد هيخصم لشخص جديد فيعتبر بتقبض مرتبك كامل... بعد 3 شهور عرفناك وهنبدأ نقيس قدراتك... ممكن من ال 3 الاف تاخد ألف فتبقي نفس الراتب ال 7 وممكن ألفين وممكن 3 الاف فيبقى مرتبك 9 ألاف... وقبل متقولي ما ممكن مياخدش شيء من ال KPI ويقبض 6 الاف؛ صح ممكن بس أظن وقتها هياخد ال 6 الاف ومعاها انذار بالفصل لتدهور المستوى... متخيل شخص ياخد صفر؟ طيب اتعين ليه؟ ففكرة مرتبك يقل اللي قالها البعض لو فكر فيها ل 3 ثواني مكانش هيقولها.

⬅️⬅️ وبعدين في بونص إضافي سري في الشركة هيبدأ من شهر نوفمبر إن شاء الله "مش أكتوبر" وهو إني بشكل نصف شهري هعمل محاضرات شخصية مباشر بره ومش في الشغل بل في الحياة؛ في الاقتصاد والبيزنس والتاريخ والإدارة وأي مجال بعرف أرغي فيه... دا يساوي فلوس على فكرة؛ أنا خلاص هبقى شرير وهاخد فلوس 😂😂

أظن اللي وصل لهنا نسي إن دا بوست توظيف اصلاً واللينك تحت لو عندك شاب حديث التخرج مواليد 2000 وما بعدها ابعت له البوست


https://forms.gle/GLyJ7YAs6vxFo6t47

من مزايا ال Ai إن معندوش "يوووووه بقى" فمش هيعترض، يعني مثلاً بعمل حاجة في شغلي ب كلود كود وبعدين قولت له عاوز كذا كذا وبالفعل عمله زي ما أنا طلبت بالظبط... بجرب معجبنيش قولت له بص عدل كذا.

*️⃣ المهم عدل بالفعل واداني وقعدت اجرب لقيت حاجات مش هتظبط لسبب ما، يلا عدل كمان مرة، ثم عملنا مرة ثالثة ثم رابعة وخلاص تمت وشوفتها زي الفل.

*️⃣ بعت للموظفين فهنا جالي ملاحظات منطقية وبالفعل دخلت تاني لكلود وقولت له عدل للمرة الخامسة 😂 الجميل اللي فورا راح عدل... بتخيل لو جايب مبرمج وتعمله كده، زمانه اخد سكرين شوت من رسايلك وشخبط على اسمك وخفاه ونشرها عالفيسبوك عن المعاناة اللي بيشوفوها من العملاء المجانين.

*️⃣ وطبعاً فاهم الناس بتاعة التخطيط المركزي وانه تعمل برين ستورم وتجمع المشاكل وتعمل خطة عمل وترسم Product Requirements Document وبعدها ترسم Product Roadmap والكلام الجميل بتاع الناس اللي بتنور على لينكد ان دي... بس دا مش أنا، الكلام الحلو دا لما تكون جايب مبرمج وشركة برمجة بتدفع لهم 20 و 30 و 40 دولار وأكثر في الساعة فهنا انك تعاني من زهق ومراهقة وتقعد تعدل زي حالاتي فحسابك البنكي هيزعل، لكن مع ال Ai لا هيقولك يوووه ولا هتعمل شيء واخرك تستني 5 ساعات الليميت يتجدد، يا سيدي اطلع لباقة 100 او حتى 200 دولار شهر خلص اللي نفسك فيه وارجع ما انتا مش مبرمج واحتياجك للبرمجة لا ينتهي...

فالناس العظيمة المنظمة دي اللي عارفه هي عاوزة ايه، انا مش منكم، قلشت على نفسي قبل ما تنظروا عليا، انا بعمل واطبق عالارض وارجع اعدل وهكذا.

من الحاجات اللي توريك إن OpenAI معاها فلوس كثير قوي، إنك لما تبعت رسايل لـ Chat مش بتخصم من الليميت، وفقط Work وCodex اللي يخصموا من الليميت، عكس كلود لو قلت له صباح الخير، هيخصمها من الليميت...

*️⃣ عشان كده بستغرب الناس اللي تقولك مفروض ChatGPT يقلد كلود ويدمج المحادثات مع Work، طيب ليه يا بشر. يعني لما بنخلص الليميت بنقعد نرغي في المحادثات، عكس كلود تخلص الليميت تقفله.

*️⃣ كمان شيء لما الشات يديك Reset تدوس عليه، فهنا يبقى معاد الريست الأسبوع بقى بعد 7 أيام من وقت الريست دا، كلود الريست عندي بتاعه يوم الجمعة 2AM، روحت عملت ريست يوم الأربعاء بالليل قالي الليميت اتجدد، بس برضه هنجدد في معادنا يوم الجمعة 2AM، فكنت هعيط 😭😭😭.

*️⃣ فلوس كثير عند عم سام البسكلته، لكن داريو حريص ومش بيبعزق، لكن في النهاية كله بيقلد كله، وبيقولك الشات هيعمل باقة برو ماكس بـ500 دولار عشان الوحوش اللي باقة الـ200 مش بتكفيهم، اللي هي بالمناسبة 20x باقة الـ20 دولار، غالبًا باقة الـ500 لو نزلوا هتبقى 50x أو 60x باقة الـ20 دي من باب التشجيع.

⬅️ طبعًا كل دا للناس اللي بتشتغل بيه، عشان الناس اللي بتستخدم AI في سؤال وجواب خسارة تدفع 1 دولار حتى، والمجاني كفاية، بس قايتك كثير في شغلك أي كان مجال إيه. بس خد بالك النداهة هتندهك، هتخش تشترك بـ20 ثم 100 ثم تشترك في كذا شيء 😭.

حصل سوء فهم إمبارح (أنا سببه لإني موضحتش كفاية قصدي) لما قولت مصر عادي بتزق الفايدة للهوت ماني ومش مزنوقه قوي بالفايدة بتاعة المركزي فمش محتاجة ترفعها، حصل ان كذا حد بعت لي يقولي ان الاذون والسندات اللي بيحدد الفايدة بتاعتها السوق مش المركزي وبناء عليه مفيش شيء اسمها مش ملتزمة بالفايدة دي... فتعالوا نوضح ايه القصة ببوست طويل والخلاصة في الاخر.

⬅️⬅️ الخلاصة والمختصر في الآخر

*️⃣ الدول بيكون عندها فايدة بيعلنا البنك المركزي، ودي بيقول اللي هيعمل عندي ايداع هيكون كذا واقتراض كذا، ليكن مصر مثلاً فايدة الايداع 19% و الاقتراض 20%... الفايدة دي مش بتاعتنا احنا دي بتاعة البنوك وبتسمى فايدة الليلة الواحدة.

*️⃣ تخيل كده البنوك اخر اليوم بتقفل ففي بنوك لقت عندها شوية سيولة زيادة فتروح رايحة مسلفهم لبنك تاني عنده العكس يعني عنده عجز سيولة... طيب يسلفوا بعض بكام؟ هنا ييجي دور المركزي بسعر الكوريدور... عندك المركزي بيقول للبنوك لو حطيت عندي هتاخد 19% واللي يستلف مني هديله ب 20%.

*️⃣ فالمركزي هنا ادى سعر استرشادي للبنوك، المركزي هيديني 19% ايداع، اديني انتا 19.2% وهديك الفلوس... والعكس أنا اقدر استلف من المركزي ب 20% فاديني انتا ب 19.7% مثلا وهستلف منك وهكذا.

*️⃣ دا بقى هو السعر بتاع الفايدة اللي بيعلنه المركزي، طيب نروح بقى للاذون والسندات.

*️⃣ الحكومة بتطلع تقول للسوق يا جدعان انا عاوزة استلف ليكن 100 مليار جنية الاسبوع دا بمدد 3 و 6 و 9 و 12 شهر و 2 و 3 و 5 سنين (الحكومة فعليا بتستلف اكبر من دا بكثير كل اسبوع) فييجي بنك يقولها هديكي 20 مليار لمدة 3 شهور ب 24% سنوي... ييجي بنك تاني يقولها انا اديكي 10 مليار لمدة سنة بفايدة 23.5% وهكذا.

*️⃣ المركزي اللي بيدير الاقتراض دا وبيقول للدولة انتا لو اخدت ال 100 اللي عاوزهم هيكون متوسط الفايدة 25% ولو نزلنا ل 80 مليار هيكون متوسطهم 23%... ساعات الحكومة تقوله لالا كثير انا اخري ادفع 22.5% فالمركزي يقولها كده العروض اللي عندي اخرها توفرلك 30 مليار بس من ال 100 المطلوبين، فالدولة تقول ماشي وينفذوا.

*️⃣ فهنا فعليا بقى اللي عرض الفايدة العالية هو البنك او المستثمر واللي وافق على دفعها وثبتها هي الحكومة (المركزي بالانابة)... فعادي ممكن بنك يقول هديك 10 مليار بفايدة 35% اجل سنة ومحدش ياخد منه.. هنا هتقولي الفايدة في مصر بقت 35 %؟ لا طبعا دا مجرد عرض... زي كده واحد عارض الاي فون ب 200 الف، طالما البيع لم يتم فدا مش سعر السلعة... سعر السلعة هو السعر اللي بتتنفذ بيه الصفقة.

*️⃣ خلصنا كده فهم الفايدة بتاعة المركزي وفايدة الاذون والسندات شغالة ازاي، تعالوا نفهم قصدي بكلمة مش ملتزمة قوي اللي قولتها إمبارح وسببت ان المتخصصين اتضايقوا مني.

*️⃣ دلوقتي أمريكا زودت الفايدة فالهوت ماني ضغطنا عليه وعاوزين نزود فايدة عشان نغريه عندنا، لكن لكن ولكن كمان مرة نفتكر الفارق فوق، فايدة المركزي دي للشغل بين البنوك، لكن فايدة الاذون دي اللي تقبلها الدولة... فعادي هنسيب الكوريدور في حاله عشان منزدوش السوق، ونزود الفايدة المقبولة في الاذون والسندات.

*️⃣ عندك مثلا أذون آجل 12 شهر كانت في مارس الحكومة بتقبلها 23.5% وفي يونيو بقينا نقبل 24.5% وامبارح الدولة اقترضت 51 مليار جنية اذون سنة بفايدة 25.671% يعني فعليا زودنا الفايدة المقبولة 2.1% في 6 شهور في حين من مارس للنهاردة فايدة المركزي ثابته.

*️⃣ فإحنا نقدر ببساطة نطلع لفايدة مقبولة 26% وحتى 27% ونغري الهوت ماني ونسيب فايدة المركزي زي ما هي...

*️⃣ طيب هل الكوكب شغال كده؟ الاجابة هتلاقي امريكا الفايدة رينج 4-4.25% وفايدة الاذون الامريكية 3 و 6 شهور هتلاقيها ضمن الرينج دا وآجل سنة 4.5% يعني زيادة بسيطة... في اليابان هتلاقي الفايدة 1.25% والحكومة بتبيع اذون 3 و 6 شهور ب 1.26% تقريبا والسنة 1.57% فمش بعيد... مصر بقى تلاقي الفايدة 19-20% ايداع اقراض والحكومة بتستلف 25-26% اللي هو عندنا فارق 25-30% ومفيش (للامانة عندنا برضك ضرايب 20% وبتنزل ل 15% لو أمريكي) لكن لو شلت حتى الضريبة مستحيل تلاقي اي اقتراض اي كان مدته بسعر في رينج الكوريدور.

*️⃣ عالعموم أتمنى كده المعنى وصل، احنا نقدر نسيب الفايدة بتاعة المركزي في حالها ونزود الفايدة المقبولة ب الاقتراض وكده الهوت ماني يكسب كثير والبنوك تكسب كثير قوي وتطلع تعلن تحقيق أرباح تاريخية لانهم هيستلفوا رخيص ويقرضوا غالي...

*️⃣ وطبعاً لا يعني ما سبق ان الفارق دا شيء طبيعي، بالعكس مينفعش يزيد لاسباب كثير زي ان المواطن نفسه يلاقي انه يسلف الدولة اكسب له فيروح يشتري مباشرة اذون وسندات حكومية عن انه يحط فلوسه في البنك وشوية أسباب أخرى. 

*️⃣ عامة اتوقع الشهور القادمة بسبب سنة الأساس التضخم يقل لكن القرارات الاقتصادية القادمة من اكتوبر هتخلي دا صعب وهتعوض اللي سنة الأساس شالته. 

*️⃣ الحكومة استلفت في 2026 حوالي 8.8 ترليون جنية من اول اذون 3 شهور لغاية سندات 5 سنين ولو وزعتهم بمكافئ لازالة التكرار وتكرار تدوير ال 3 و 6 و 9 شهور هتكون استلفت 6000 مليار جنية السنة دي، فال 1% تعني 60 مليار جنية (دا باعتبار السنة بتخلص في سبتمبر 😂) 

---------
⬅️⬅️ الخلاصة و المختصر

*️⃣ فايدة المركزي دي هي فايدة بتتحكم في التعاملات بين البنوك، بينما فايدة الاقتراض بيعرضها اللي عاوز يسلفك ولما تقبل بيها بتثبتها... زي ما حصل والفايدة ل 12 شهر المقبولة زادت 2.1% اخر 6 شهور. 

*️⃣ فالدولة تقدر تسيب فايدة المركزي في حالها وتقدر تزود الفايدة المقبولة في الاقتراض... فيبقي عندنا عالم بنكي بسلعب في 19-20% وعالم قروض حكومية في 25-26% وممكن نطلع ل 27% (قبل الضريبة)... فنظريا اسمنا مزودناش لكن فعليا زودنا.

*️⃣ الحكومة اقترضت 8.8 ترليون جنية في 2026 وما يعادل مكافئ 6 ترليون جنية باعادة توزيع والغاء تكرار تدوير الاذون القصيرة.. ودي مجرد أرقام عشان تتخيل الوضع الصعب وحركة الفايدة وأثرها

حوالي مليار ونص دولار دخلوا الهوت ماني في مصر آخر أسبوع ودا شيء غريب جداً لإن النهاردة في اجتماع البنك المركزي لتحديد الفايدة (كان في توقعات رفع الفايدة بس المركزي ثبتها)

*️⃣ لكن دخول الهوت ماني وضح ان المتوقع تثبيت الفايدة لإن مفيش منطقي لو متوقع الفايدة هتزيد يوم الخميس في مصر فتروح داخل قبلها، طيب ما تستني يا عم وتخش عالفايدة الغالية.

*️⃣ عامة مصر مش ملتزمة قوي بحوار الفايدة 19% إيداع و 20% إقراض لإن فعلياً الفايدة للاقراض وصلت 25.8% (سنوي لاذون 9 شهور) وفائدة ال 3 سنين فوق 23% فالموضوع ضارب فوق وطبعاً للتذكير الارقام دي لسه عليها ضريبة 20% للمصريين والاجانب العاديين و 15% للأمريكان.

*️⃣ فالوضع حالياً إن المركزي بيراهن ان الفايدة عالية فعلياً وان الارقام الرسمية هي نظرية برضك وهنديكم أكثر منها فلما تحسبوا الفايدة الحقيقية متبصوش ل 19% الرسمي بل 22% الفعلي... اللي هو مش اقتصادي قوي لكن بالحب 😂.

*️⃣ لكن عدم رفع المركزي حلو لإنه لو راح رافع هيخلي البنوك ترفع وبالتالي القروض تزيد والتقسيط يزيد والبلد عايشة بالقسط أصلا 😂 لكن عندك اجتماع فيدرالي يوم 28 أكتوبر فلو راح مزود تاني فهنا مفيش خيار عندنا... بالمناسبة اجتماع مصر القادم يوم 29 أكتوبر وراهم على طول.

*️⃣ ربنا يهدك يا ترامب انتا واليابان اللي هتولع الدنيا بالفايدة بتاعتها.

بعد 10 أيام من النوم بجهاز تنفس BiPAP أقدر أقول إن النوم الحقيقي دا شيء عبقري الواحد محروم منه من سنين... إحنا ساعات بنتعود على (قلة الصحة) ونفتكر دا شكلنا العادي والطبيعي.

*️⃣ مش عارف ترتاح ولا بتشبع من النوم مهما تنام، وفاكر إن السبب ببساطة عشان تخين. سنين عايش كده، وبعدين يطلع عندك Sleep Apnea مستوى AHI وصل 85 (الطبيعي أقل من 5، وفوق 30 يعتبر مرض شديد)، وطبعاً الوزن ليه عامل عشان منخشش في نقاش في التعليقات.

*️⃣ النوم مهم قوي، الجسم بيجدد نفسه وإنتا نايم، ومخك عاوز الأكسجين والنوم... والمشكلة في Sleep Apnea إن النفس بيتوقف أو يقل بشكل متكرر وإنتا نايم، وده ممكن يخفض الأكسجين ويقطع جودة النوم. فلما يكون عندك مرض انقطاع النفس أثناء النوم بشكل متطور فدا خطر، إنتا بتدمر حياتك وبتدمر جسمك ومخك، والمخ حاجة ما ينفعش نخاطر بيها مع نقص الأكسجين المتكرر.

*️⃣ مش بكتب البوست دا عشان أتكلم عن نفسي، بل عشان أقولكم لو بتعاني روح اكشف، ولو طلعت مريض اشتري الجهاز المناسب لحالتك CPAP/BiPAP. صدقني حياتك هتتغير، بعد ما كنت بتنام 10 و12 ساعة وبتصحى مرهق ومقضي يومك بالكافيين، فجأة هتلاقي 6 ساعات تكفي، فجأة حياتك هتلاقيها تتغير.

*️⃣ تخيل نفسك ضفت 4-5 ساعات زيادة في يومك المعتاد، شغلك ووظايف أكثر هتقدر تعملها، بل وهتعملها أحسن. عارف لما تعيش سنين محروم وأشبه باللي بيجري ومحطوط كتل حديد رابطاه وبعدين يفكوها؟ دا إحساس جسمك بالظبط، فإنتا مش بس هتضيف 4 ساعات ليومك كنت بتنامهم، بل وباقي اليوم بقيت فايق بدون ذرة منبهات.

*️⃣ ساعات الناس تقولك فاقد الشيء لا يعطيه، هتاخد نصيحة من تخين، ولا مريض؟ بس عارف، دا أحسن واحد بينصحك عشان هو بيكلمك من هناك.

⬅️ ملحوظة: الـSleep Apnea بيجي للتخين والرفيع، لكن الوزن الزايد بيزود احتمالية الإصابة، وممكن يزود شدة الحالة.

نظرًا لتوسعات Dokkan Tech خلال الفترة القادمة، عندنا حاليًا مسارين متاحين للمهتمين بالتعاون معانا:

⬅️1️⃣ فرص التوظيف

لو مهتم بالانضمام لفريق Dokkan Tech، عملنا فورم تقديم تعتبر جزء أساسي من مرحلة التقييم الأولي. الوظائف المتاحة لحديثي التخرج أو لطلبة الجامعات ولا تحتاج لأي خبرات سابقة.

الفورم متصممة علشان نعرف عنك المعلومات المهمة قبل المقابلة، ونوفر وقتك ووقتنا بدل ما نعمل مقابلات أولية طويلة مع كل المتقدمين.

ياريت تجاوب على الأسئلة بدقة ووضوح، لأن إجاباتك بتكون جزء مهم من تقييم طلبك.

رابط التقديم:
https://forms.gle/kj1NZEvi3qXA8EpZ7

⬅️2️⃣ المشاركة في تمويل شحنات Dokkan Tech

شكرًا جدًا لكل الناس اللي سجلت اهتمامها بالمشاركة في تمويل شحنات Dokkan Tech ❤️

عدد التسجيلات اللي وصلنا حاليًا أكبر من احتياج دورة التمويل الحالية، ولذلك قررنا إيقاف استقبال طلبات جديدة مؤقتًا لحد ما ننتهي من مراجعة والتواصل مع الأشخاص المسجلين بالفعل ونتأكد من حجم المشاركة الفعلية.

لو اكتمل الاحتياج من المسجلين الحاليين، هنكتفي بالطلبات الموجودة.

ولو ظهر بعد المراجعة إننا لسه محتاجين مشاركات إضافية، هنفتح التسجيل مرة تانية ونعلن عنه بشكل واضح.

شكرًا جدًا لثقتكم واهتمامكم بـ Dokkan Tech.

الـAI مش بيخترعلك ذكاء.

*️⃣ لو إنت ذكي وفاهم اللي بتعمله؛ فالـAI هيكبر قدراتك ويخليك تعمل حاجات أكثر وأسرع وتوصل لحاجات مكانتش متاحة ليك بوقتك وإمكانياتك العادية.

*️⃣ لكن لو إنت مش فاهم الموضوع أصلًا؛ فالـAI مش هيزرعلك الفهم في دماغك بالعافية 😁.

*️⃣ وهنا بقى أهم حاجة في رأيي هي "الوعي" بحجم قدراتك ومعرفتك؛ لازم تبقى عارف إنت فاهم إيه ومش فاهم إيه، وإيه اللي إنت واثق فيه فعلًا وإيه اللي عندك فيه شك أو مجرد انطباع... لإن المشكلة مش إنك متعرفش؛ المشكلة إنك متبقاش عارف إنك متعرفش.

*️⃣ الحاجة اللي إنت مش متأكد منها لو دخلت للـAI تسأله عنها فاتح صدرك وواثق جدًا ممكن بسهولة تقع في الانحياز التأكيدي Confirmation Bias؛ يعني بدل ما تسأله «هل الفكرة دي صح ولا غلط؟ وإيه الأدلة ضدها ومعاها؟» تدخل تقوله «هات لي أمثلة تثبت إن كذا صح».

*️⃣ طب ما أكيد فيه حد في مكان ما في الكوكب عمل الحاجة اللي في دماغك 😂 والـAI عنده كم مهول من المعلومات؛ فيطلع لك مثال واتنين وتلاتة وعشرة يدعموا فكرتك... فتخرج من الحوار مبسوط وتقول «شوفت؟ أنا كنت صح» مع إن اللي حصل فعليًا إنك ما اختبرتش فكرتك أصلًا؛ إنت بس طلبت من الـAI يدور لك على الأدلة اللي توافقها.

*️⃣ والأسوأ إن استخدام الـAI بالشكل دا ممكن يخليك أسوأ مع الوقت مش أحسن؛ لإن الطبيعي إن الإنسان تدخل له معلومات جديدة تخليه أحيانًا يثبت على رأيه وأحيانًا يعدله وأحيانًا يقول لا أنا كنت غلط أصلًا... لكن إنت ممكن كل يوم تستخدم أقوى أداة معلومات ظهرت في حياتنا عشان تعمل حاجة واحدة بس؛ تقول لنفسك «أيوه أنا صح» 😁.

*️⃣ والمشكلة إن الـAI ممتاز جدًا في المهمة دي؛ لو إنت عاوزه يقنعك بحاجة غالبًا هيعرف يجيب لك أمثلة وحجج ومصادر وصياغة محترمة تخلي الفكرة شكلها أقوى... وخصوصًا لو إنت أصلًا مش فاهم المجال كفاية عشان تعرف إن المثال اللي جابه استثناء أو إن الحجة ناقصة أو إن في أدلة أقوى في الناحية الثانية.

⬅️ عشان كده يمكن من أهم المهارات في عصر الـAI مش إنك تبقى أذكى واحد في القاعدة؛ لكن إنك تبقى واعي بحدود ذكائك ومعرفتك.

*️⃣ لو فاهم الموضوع كويس استخدم الـAI عشان يوسع قدراتك ويوفر وقتك ويخليك تعمل أكثر... لكن لو إنت مش متأكد متدخلش تسأله سؤال الواثق؛ قوله مثلًا «أنا فاهم الموضوع بالشكل ده؛ ممكن أكون غلط فين؟ إيه اللي مش واخد بالي منه؟ وإيه أقوى حجة واعتراض ضد اللي أنا مقتنع بيه؟» فيساعدك تتحدى أفكارك وتطورها.

⬅️⬅️ الـAI ممكن يضاعف قدراتك فعلًا... وممكن برضك لو استخدمته غلط يبقى مجرد مكبر صوت ضخم جدًا لأفكارك الغلط 😁. ال Ai مش هيزرع لك ذكاء في مخك.

النهاردة أنا قابلت أغرب نقاش دخلته على فيسبوك في حياتي. أنا متعود أخش نقاشات سياسية واقتصادية واجتماعية، بل ساعات بنخش في نقاشات دينية؛ والمواضيع دي كلها بطبيعتها فيها مساحة للرأي... إنت شايف فلان صح وأنا شايفه غلط، أنا شايف الطريقة الاقتصادية دي أفضل وإنت شايف غيرها. إنما النهاردة دخلت في نقاش غريب جداً؛ نقاش في الأرقام.

*️⃣ جريدة الشروق كانت منزلة بوست بتقول فيه إن العملة فقدت 87% من قيمتها، وإن الحاجة اللي تساوي 100 جنيه النهاردة كانت تساوي 10 جنيه وشوية سنة 2010. فالناس مش واحد ولا اتنين؛ ناس كثير داخلة تقولك لأ إيه 87% دي؟ العملة فقدت 200%... واحد تاني يقولك لأ فقدت 1000% 😳. فأنا دخلت أقول يا جدعان مفيش حاجة اسمها رقم انخفض 1000%؛ الانخفاض نفسه لا يمكن يتجاوز 100%... فالناس تعترض وتتناقش! يا عم ما ينفعش؛ الأرقام مفيهاش رأي.

*️⃣ يعني الحاجة كانت بـ100 جنيه وبقت بـ1000 جنيه؛ كده سعر الحاجة زاد 900%، وفي المقابل الـ100 جنيه القديمة بقت تشتري 10% بس من اللي كانت بتشتريه، يعني العملة فقدت 90% من قيمتها بالنسبة للحاجة دي. لو الحاجة بقت بـ1500 جنيه يبقى سعرها زاد 1400%، والعملة بقت تساوي 6.67% من قيمتها القديمة؛ يعني فقدت 93.33%. ولو بقت بـ2000 جنيه يبقى سعر السلعة زاد 1900% والعملة فقدت 95% من قيمتها. مفيش هنا رأي؛ دي حسبة.

*️⃣ الزيادة ممكن تعدي 100% عادي جداً؛ حاجة كانت بـ100 وبقت بـ1000 زادت 900%، وممكن تزيد 1000% ومليون في المية عادي. لكن الانخفاض نفسه له نهاية؛ الحاجة اللي قيمتها 100 ممكن تنزل لـ50 فتبقى خسرت 50%، وتنزل لـ10 فتبقى خسرت 90%، وتنزل للصفر فتبقى خسرت 100%... خلاص كده انتهت. متقدرش تقول إنها انخفضت 200% أو 1000% وهي أصلاً وصلت للصفر 😁. الشركات مثلاً ممكن تخسر أكثر من 100% من رأس مالها لإنها بعد ما تخلص رأس المال تدخل في ديون؛ لكن دي خسائر مقارنة برأس المال، مش إن قيمة رقم موجب نفسها نزلت أكتر من 100%.

*️⃣ طب تعالوا نشرحها بطريقة ابتدائي خالص... اعتبر الـ100% دي عبارة عن 100 برتقانة 🍊. إنت معاك 100 برتقانة؛ ينفع يقع منك 50؟ آه، كده فقدت 50%. ينفع يقع منك 90؟ آه، كده فقدت 90%. ينفع يقع منك الـ100 كلهم؟ آه، كده فقدت 100%. طب ينفع يقع منك 200 برتقانة وإنت أصلاً معاك 100؟ 😁 لأ طبعاً... إنت مش ممكن تفقد أكتر من اللي معاك. فالعملة قيمتها الأصلية هي الـ100%؛ ممكن تفقد منها جزء، وممكن تفقدها كلها، لكن مش ممكن تفقد 200% أو 1000% من قيمة أصلها 100%.

*️⃣ والمشكلة إن والله العظيم ناس مش مقتنعة؛ واللي داخل يتريق واللي داخل يشتم 😳. هو للدرجة دي بديهيات الأرقام بقت محل نقاش؟ يعني تخيل تمسك آلة حاسبة تكتب 1+1=2 فيدخل حد يقولك لأ أنا رأيي إنها 3 😂... يا جماعة دي مش سياسة ولا اقتصاد ولا دين عشان نقول رأيي ورأيك؛ دي حسابات. كلنا معانا موبايلات؛ افتح ChatGPT واسأله: هل انخفاض قيمة شيء موجب ممكن يتجاوز 100%؟ يعني دي حاجات إحنا خدناها في ابتدائي وإعدادي... والناس داخلة تتناقش فيها كأنها وجهة نظر 😭😂.

صباح الخير

برضك الملخص في النهاية بعد الخط 😂

*️⃣ إمبارح الفيدرالي زود الفائدة زي ما أكيد كلنا تابعنا؛ المهم يعني للي ميعرفش فالفيدرالي بيجتمع 8 مرات في السنة، منهم 4 مميزين شوية بيكون فيهم توقعات الاقتصاد وده بيسموه Dot Plot... إحنا فاكرين إن الاجتماع ده بيكون يلا نقعد ساعة وكيفين وارش يقول أنا بفكر أزود الفائدة فيقرروا الزيادة... لا خالص، الاجتماع بيكون يومين وبعدها بيحصل تصويت في نهايته.

*️⃣ طيب مين بيحضر الاجتماع؟ بيكون مجلس المحافظين ودول 7 أشخاص، ومعاهم 12 شخص دول رؤساء البنوك الفيدرالية الإقليمية. أيوه أمريكا عندها 12 بنك فيدرالي إقليمي، والاجتماع ده أشبه باجتماع البنوك المركزية مع بعض؛ ولو رجعت لتاريخ أمريكا هتلاقيهم من قرن ونص مكانوش متفقين وكانت البنوك بتطبع دولارات مختلفة وحاجة آخر سمك لبن تمر هندي 😂 لكن من حوالي 110 سنة قرروا يخلصوا العك ده وعملوا الفيدرالي الكبير ورتبوا الدنيا.

*️⃣ المهم بقى الـ19 شخص دول بيقعدوا يومين يتناقشوا، وبعدها يتم عمل تصويت الفائدة؛ اللي بيشارك في التصويت هم أعضاء مجلس المحافظين الـ7 ومعاهم 5 رؤساء للبنوك الفيدرالية الإقليمية... التصويت إمبارح كان 12-0 لزيادة الفائدة... إجماع ساحق.

*️⃣ هتقولي يعني الـ7 الآخرين دول مش بيشاركوا في شيء؟ هقولك لا، بيشاركوا في توقعات الاقتصاد للسنوات القادمة والنمو والبطالة، وأهم شيء هنا معانا هو توقع الفائدة... يعني الـ19 شخص كلهم بيشاركوا في التوقع ده، لكن كيفين وارش رئيس مجلس الفيدرالي قالك مش هشارك في التوقعات دي فبقوا 18 واحد.

طيب يا ترى بقى توقعاتهم إيه؟

*️⃣ نهاية 2026 في 12 عضو توقعوا زيادة الفائدة كمان 0.25%، و4 أعضاء قالوا هتزيد 0.5%، و2 أعضاء قالوا نتوقع كفاية كده وأتوقع تثبيت. يعني كده نقدر نقول 16 عضو من الـ18 متوقعين إن في زيادة واحدة على الأقل قادمة في اجتماع من اجتماعي 28 أكتوبر أو 9 ديسمبر.

*️⃣ طيب المستقبل بقى الطويل؟ حالياً الفائدة بقت 3.75%-4.00%، يعني ممكن نشيل ونقول إنها 4.00% للتسهيل عشان تعرف تتابع، بس افتكر أمريكا الفائدة عندهم نطاق مش رقم واحد.

*️⃣ نهاية 2027 في 8 توقعوا توصل 4.5%، و6 توقعوا 4.25%، و3 توقعوا 3.75% يعني تخفيض، و1 توقع 3.25% يعني تخفيض أكبر.

*️⃣ نهاية 2028 في 4 توقعوا 4.25%، و5 توقعوا 4.00%، و3 توقعوا 3.75%، و1 توقع 3.5%، و4 توقعوا 3.25%.

*️⃣ نهاية 2029 في 3 توقعوا 4.00%، و7 توقعوا 3.75%، و2 توقعوا 3.5%، و4 توقعوا 3.25%، و1 توقع 3.0%.

⬅️ يعني النظرة العامة للدش ده؛ التوقع الحالي هو إن لو محصلش متغير جوهري في الكوكب وصعب يحصل؛ فهنشوف إما في أكتوبر أو ديسمبر زيادة كمان 0.25% ونبقى 4.25%. والمشكلة إن 14 من الـ18 شايفين مستوى 2027 هيبقى إما 4.25% أو يزيد لـ4.5%، فمفيش تخفيض متوقع في 2027، وتوقعاتهم يبدأ فيها التخفيض يظهر في 2028 و2029.

*️⃣ فيلا بينا نجهز عشان عندنا طلعة... بالمناسبة البنك المركزي المصري في تقرير السياسة النقدية الشهر الماضي توقع أصلاً زيادة التضخم، فمعانا زيادة تضخم متوقعة + زيادة بنزين متوقعة + الفيدرالي زود الفائدة = بالنسبة لي شبه مؤكد إن البنك المركزي المصري هيزود.

*️⃣ لو عمل شبح ومزودش في 24 سبتمبر فعنده اجتماع 29 أكتوبر ثم 17 ديسمبر... ولو حصلت زيادة بنزين 3 جنيه والفيدرالي إدانا ربع كمان = أنا متوقع المركزي في مصر يدينا 2-3% قبل نهاية السنة للأسف.

يلا يا ابني اطرح لي شهادة +20% وسميها شهادة الكتاكيت الشطار ولا أي اسم المرة دي... نسميها شهادة أبو حنان عشان هو السبب 😂.

--------------------------

⬅️⬅️⬅️⬅️⬅️⬅️ ملخص الشباب

*️⃣ عندك 16 من 18 شخص في اجتماع الفيدرالي إمبارح توقعوا إن في زيادة 0.25% على الأقل كمان قبل نهاية السنة، إما أكتوبر أو ديسمبر.

*️⃣ توقعات الاقتصاد الأمريكي للفائدة بتقول إن الغالبية مش متوقعة أي تخفيض في 2027، وبداية التخفيض تظهر أكثر في 2028 و2029.

*️⃣ البنك المركزي المصري كان متوقع زيادة التضخم أصلاً، فزيادة الفائدة في أمريكا إمبارح + المتوقعة قبل نهاية العام + زيادة البنزين المتوقعة تخليني أتوقع زيادة فائدة في مصر قد تصل لـ3% قبل نهاية السنة، وممكن يوزعوهم على الـ3 اجتماعات؛ سبتمبر وأكتوبر وديسمبر.

*️⃣ وأتوقع نشوف تاني شهادات 20% أو أكثر بالبنوك قبل نهاية السنة، إلا لو المركزي متفائل إن الوضع أزمة قصيرة.

تم رفع الفايدة 0.25%

فلنستعد للمرجحة

للتذكير، أنا من شهور بقول مش متوقع رفع فائدة غير نهاية السنة عشان الانتخابات وترامب يخف علي كيفين وراش

*️⃣ بس لسبب ما الاسواق مصرة ان الارتفاع دلوقتي، أتمني ميحصلش أي ارتفاع دلوقتي

*️⃣ اصل بعيد عن الامنيات، تكلفة اعادة تمويل الديون الامريكية هتزيد بشكل صعب قوي، هما يولعوا بجاز بس المشكلة هيولعوا في الكوكب كله معاهم... فهما يثبتوا واحنا نثبت.

*️⃣ عالعموم ساعات ونعرف يا ترى توقعات السوق هتنتصر ولا أمنية بن سامي 😂

⬅️⬅️⬅️ اه للي بيسأل، زيادة الفايدة خبر وحش للذهب، التثبيت حلو، الخفض مستقبلا حلو قوي للذهب.

*️⃣ تخيل كده تكون الاسواق متوقعه الرفع علنا بس من تحت لتحت اشتروا ذهب وواخدين السوق Short فهوبا يعملوا سبوبة... هي حركات عالم ثالث بس أمريكا بقت منافس قوي لينا هي ومؤسساتها

صباح الخير

بوست طويل لكن طبقاً لنصيحة دكتور عمر الشنيطي ان بوستاتي لازم يكون فيها ملخص، فاللي مفرهد يروح آخر البوست هيلاقي كلمتين الخلاصة.

*️⃣ النهاردة اجتماع الفيدرالي لتحديد الفائدة في أمريكا ويعتبر لكوكب الأرض، وبسبب عبقرية ترامبو فخلاص الأسواق بقت متوقعة هيحصل النهاردة رفع فائدة بنسبة 0.25% والتوقع نسبته بقت تفوق 90% ومحصلش آخر 30 سنة ان التوقعات وصلت للمستويات دي ومتحققتش، بس كل شيء وارد.

*️⃣ لما أمريكا ترفع الفايدة فالبنوك المركزية المربوطة بالدولار زي البنوك الخليجية هي كمان بعد دقايق هتطلع قرار برفع برضك 0.25% مماثل، وعندنا المركزي الأوروبي رفع الأسبوع الماضي هو كمان 0.25% ومبقاش فاضل غير العاق بنك انجلترا اللي ثبت الفايدة يوم 31 اغسطس وعنده بكره اجتماع وغالبا هيخالف الركب العالمي ويثبت الفايدة لكن التوقعات انه هيرفع 4 مرات بحلول منتصف 2027 يعني هو متأخر بس.

*️⃣ نروح للبنك المركزي المصري اللي عنده اجتماع يوم 24 سبتمبر، ولو الأمريكي رفع وعشان نفضل حلوين للهوت ماني فلازم نرفع الفايدة مع الاختلاف، ال 0.25% في الكوكب دي تساوي عندنا رفع 1% إلى 1.5%... مهو غلاء الاسعار في كله حتى سعر الفايدة، وللمتابعة بس الفايدة حالياً الفيدرالي 3.75% وانجلترا 3.75% والاوروبي 2.5% والياباني 1.0%... ايه دا هو أنا مقولتش لك ان الياباني هو كمان بعد بكره عنده رفع فايدة ل 1.25% ودا كوم وكل الجماعة دول كوم، الياباني دا أهم واحد فيهم

*️⃣ اليابان هي مقرض الكوكب، اليابان عندها حوالي $11–12 تريليون أصول خارجية، وصافي أصولها على العالم حوالي $3.5 تريليون، وفي نفس الوقت الاقتراض العالمي بالين وصل لحوالي $2.34 تريليون... هي كانت اخر 30 سنة مصدر للسيولة الرخيصة، الناس تستلف ين ياباني ببلاش وتروح تدخله في الدول هوت ماني... فلما اليابان ترفع الفايدة كده مبقاش في فلوس رخيصة بالعالم...

*️⃣ اليابان سنة 1999 خلت الفايدة عندها 0% أيوا صفرررر... وسنة 2016 خلتها سالب 0.1% يعني تروح تدي ليكن مليار ين للمركزي الياباني، بعد سنة يرجعهم لك 999 مليون ين وانتا فلوسك قلت مليون ين 😁 ربا عكسي البنك هو اللي بياخد منك فوايد مش العكس 😂... لكن آخر سنتين الياباني اضطر يطلع فوق الصفر ووصل 1%

*️⃣ المهم يعني الكوكب داخل معجنة فايدة تاني والشرارة لما كيفين وارش يطلع النهاردة بالليل يقولك زودنا، كله هيبدأ ضرب ضرب.

*️⃣ وقبل ما تقولي أنا مش بتعامل مع بنوك ومش فارقه هقولك إنتا عايش في الكوكب معانا... هي الشركة اللي انتا شغال فيها مش عليها قروض؟ ايه دا انتا صاحب الشركة خلاص قولي كل عملاءك مش بيتعاملوا بقروض ولا تقسيط فمش هيتأثروا؟ طيب بلاش أنتا وكل عملاءك وعملاءهم كلكم مش شغالين في قسط ولا فوايد ولا قروض... طيب مصر؟ تسمع عن مصر؛

*️⃣ مصر كل أسبوع بتطلب متنوع في أذون 3 شهور و 6 شهور و 9 شهور و 12 شهر و 2 و 3 و 5 سنين... عارف من بداية السنة 2026 مجموع دا كام؟ مبلغ 8.64 ترليون جنية... يعني 8630 مليار جنية... طبعاً بعضها زي ما وضحت 3 و6 شهور فممكن استلف فلوس في يناير واسددها أبريل واستلفها تاني واسددها يوليو واستلفها تاني فممكن نفس المبلغ يظهر كذا مرة... لكن لو عملت توزيع نسبي للمدد عالزمن يبقى كإننا استلفنا 5.7 ترليون جنية... يعني متوسط يومي 22 مليار جنية... السنة بتعمل 8.15 ترليون جنية فعلياً فلوووو زادت الفايدة 1.5% دي تسمع على طول 122 مليار جنية تكلفة زيادة عالدولة والرقم دا تقريباً دعم رغيف العيش ل 66 مليون مصري لمدة سنة. فهيأثر عليك.. الضرائب

*️⃣ والمشكلة إن عناد ترامبو خلى الموضوع صعب عالكوكب كله؛ البترول خلاص استقر فوق ال 100 دولار والأزمة بتاعة التكرير عمالة تزيد وقبل كام أسبوع وصل هامش تكرير السولار Diesel Crack Spread اللي هو عندنا بترول هناخد عليه كام عشان نديك برميل سولار... الرقم دا كان وصل 111 دولار.. أيوا يعني هامش التكرير بقى أغلى من سعر البترول نفسه... والأسبوع دا سعر السولار في أمريكا كسر السقف و ال 6 دولار للجالون لأول مرة في تاريخ أمريكا.

*️⃣ والبترول وضعه لطيف بالنسبة للغاز المسال اللي وصل لأعلى مستوياته من سنتين والمليون وحدة حرارية MMBtu بقت 27 و 28 دولار وبنجلاديش اشترت الغاز المسال ب 30 دولار تقريباً... إنتا مش فاهم ايه المشكلة صح.

*️⃣ وزارة الكهرباء في مصر بتشتري الغاز ب 4 دولار من البترول لل MMBtu وزارة البترول بقى بتجيبه منين... شوية حصتنا ودي أقل من 2 مليار قدم... وفي بتاع 1.6 مليار قدم تقريباً حصة الشريك الأجنبي بنديله 6-7 دولار... وولاد الغم بناخد منهم 1.25 مليار ب 9 دولار تقريباً وبنستورد الباقي مسال من أبو 30 دولار دا.... ضرب دول في بعض في الخلاط تلاقي في الصيف "زي دلوقتي" استهلاك المسال عالي فمتوسط التكلفة 11 دولار... وفي الشتاء لما ييجي يقل شوية الاستهلاك فيقل اعتمادنا عالمسال الغالي قوي دا فالمتوسط ينزل ل 9 دولار مثلاً.. للتذكير وزارة الكهرباء بتاخد الغاز دا ب 4 دولار وقاعدة تذل فينا وتقولك الكهرباء مدعومة... أومال لو أخدت الغاز بالسعر الحقيقي... وقتها هتبقى قصة +21.

*️⃣ لو عاوز تترجم دا ل فلوس فالغاز المسال اللي احنا من سنتين مكناش نسمع عنه ولا عن سفن فك الأسالة دي؛ البنك اللي ظهر فجأة في 2024 دا بقى يكلفنا حالياً "في الصيف" شهري 2 مليار دولار... ولإن الخوازيق لا تأتي فراداً فما شاء الله اللهم لا حسد وزارة البترول بتعمل عزف منفرد في الإنهيار؛ يناير كان انتاج مصر 3.93 مليار قدم وفي أغسطس بقى 3.61 مليار قدم يعني انتاجنا تراجع 10% في 8 شهور.

*️⃣ ولإنه هيطلع اللي يقولك إزاي دا الوزارة كل يومين تقولك اكتشاف حقل وعمل مش عارف ايه... كل دا لا يكفي لصد التراجع... يعني مثلاً مثلاً التراجع في الحقول ليكن 500 مليون هما اكتشفوا وشغلوا حاجات جديدة ب 150 مليون فكده التراجع بقى 350 مليون فيطلعوا في الجرايد يقولك إنجاز لقطاع البترول شغلنا حاجات جديدة ب 150 مليون وإنتا تصدق وهو يصدق ونضحك كلنا. *️⃣ في العام المالي 25/26 مصر استهلكت 186 شحنة غاز مسال... قولنا إحنا شغلنا حقول جديدة واتفقنا مع ولاد الغم يزودوا الضخ... فالنتيجة العام الحالي 26/27 الوزارة تستهدف استيراد 230 شحنة يعني 23% زيادة في المسال.

*️⃣ طيب يا عم بن سامي تقصد خربت والدولار هيبقى ب عشروميت جنية وو... أنا قولت كده؟ خالص أنا لازلت بقول انتا مستقر بس الاستقرار الحالي مكلف قوي؛ فلو ربنا مكرمش والحرب خلصت والبترول نزل والغاز نزل والقناة رجعت تشتغل وأوضاع المصريين في الخليج مبقتش أحسن عشان بيصرفوا علينا ... فهتشوف شوية إجراءات مؤلمة من الشهر القادم زي 2-3 جنية كمان في البنزين.

---------------------
⬅️⬅️⬅️⬅️ الملخص للي نفسه قصير

*️⃣ احتمال فوق 90% أمريكا ترفع الفائدة النهاردة ودا هيجبر مصر ترفع الفائدة ما بين 1% إلى 1.5% يوم 24 سبتمبر دا لو معملناش اجتماع قبلها.

*️⃣ مصر بتستلف يومي 22 مليار جنية فعلياً فرفع الفائدة هيكلف الدولة ما بين 80-120 مليار جنية سنوي زيادة فوائد وهيزود تكلفة التقسيط عالمواطين والاقتراض عالشركات.

*️⃣ سعر البترول شارخ في السماء والمشكلة السعر الإجمالي بعد إضافة التكرير بيوصل لمستويات خزعبلية فمثلاً السولار بتوصل التكرير "هامش الربح للمصافي" لأكثر من 100 دولار ودا خلى السولار في أمريكا يتجاوز 6 دولار للجالون.

*️⃣ سعر الغاز الطبيعي حالياً هو الأغلى من سنتين ومرشح للزيادة ودا هيضغط على مصر اللي بتستورد غاز مسال.

*️⃣ ارتفاع سعر الغاز المسال هيزود متوسط تكلفة الغاز عالدولة ل 10-11 دولار بينما وزارة الكهرباء بتشتريه ب 4 دولار.

*️⃣ لا يعني أي مما سبق إن في قلق وهننهار بس يعني ان تكلفة الاستقرار بقت عالية... ومحدش يقعد يقولي الدولار هيجيب كذا... متفكرش غير لما تشوف ال 55 بتتكسر غير كده دي حركة مؤقته وهنطلع وننزل. وبالمناسبة 1 جنية زيادة في الدولار يعني 2% زيادة مهواش رقم ضخم احنا كنا بنشوف بال 100% زيادة فليه ركبنا تخبط 2 و 3 و 5% عييب.

موضوع إن في مدرسين اترفضوا في مسابقة تعيين 30 ألف مدرس عشان وزنهم مش مثالي، موضوع غريب ويضايق لأسباب كثيرة لكن هكتفي ب 2 سبب:

1️⃣ تطبيق قاعدة Broca Index اللي من سنة 1871 يعني من قبل ثورة عرابي لتعريف الوزن المثالي سنة 2026 يدل إن اللي بيختبر المعلم مش متعلم، قاعدة Broca Index للي ميعرفهاش هي فكرة ان طولك 175 سم يبقي وزنك 75 كيلو وطولك 160 سم يبقي وزنك المثالي 60 كيلو... مشكلة القاعدة العتيقة دي إنها متعرفش شيء اسمه كتلة عضلية أو بالبلدي كده (عظمة ثقيل) فممكن 2 شخص طولهم 175 سم ووزنهم 80 كيلو تلاقي واحد عرض كتافه قليل وعنده كرش صغير، والثاني عرض كتافة واسع وعضلات فمينفعش تحطهم في مقياس واحد عمره 155 سنة، وقبل ما تقولي يعني هنفحص كتلة عضلية ل 100 الف متقدم، هقولك مش انتا اللي اخترعت فكرة الوزن يبقي تطبقها صح.

2️⃣ فكرة إنك تعين مدرس دوره يعلم الطلبة العدالة وعدم التنمر وإن مفيش تفرقه، في حين هو نفسه متعين بمقاييس عنصرية ومعايير ملهاش علاقة بالكفاءة فهي في حد ذاتها فكرة مثيرة للاندهاش، كإنك قررت تعمل جهاز مكافحة التمييز العنصري وتقول معايير اختيار رئيس الجهاز انه يكون ابيض البشرة وعنيه ملونة ودارس في جامعات أجنبية ذات 3 أحرف وساكن في منطقة راقية... يلا بقى كافح العنصرية... يلا يا مدرس قول للطالب ان مينفعش تتنمر على زميلك التخين، في حين انتا يا مدرس معينوش زميلك عشان تخين.

وفعلا يا مصر بتعمليها إزاي

جالي فضول أعرف هو القطاع العقاري باع كام عبر السنوات الماضية، وللتوضيح لما يقولك مبيعات 600 مليار فدا مش معناه اتدفع 600 مليار بل وحدات سعرها 600 مليار بعد دفع كل اقساطها، فعليا مش مدفوع غير 5% او 10% مقدم وكده من رقم المبيعات دا..

*️⃣ المهم قررت أوحد وأشوف قيمة مبيعات أكبر 10 مطورين عقاريين في مصر خلال أول 6 شهور من كل سنة وكانت الأرقام كالتالي والتذكير دي 6 شهور مش سنة:

سنة 2021 = 65 مليار جنية (تقريبي)

سنة 2022 = 90 مليار جنية

سنة 2023 = 168 مليار جنية

سنة 2024 = 647 مليار جنية

سنة 2025 = 651 مليار جنية

سنة 2026 = 670 مليار جنية

*️⃣ الملاحظ ان النصف الاول لاعوام 24 و 25 و 26 يكاد يتطابق رغم زيادات الأسعار ودا معناه انخفاض عدد الوحدات المباعة.

*️⃣ هتقولي ايه رأيك يعني، هقولك ادعي لي طاقتي استردها وأنا مجهز درافت من 5 أجزاء لكيف يتعامل العالم مع القطاع العقاري ولماذا مصر مختلفة عن الكوكب ورغم انه قطاع بيبيع ب أكثر من 2 مليار دولار شهري لكنه شغال بلا قيود وبلا رقابة وبلا حساب مما خلق ثروات طائلة بنشوفها في الساحل.

*️⃣ هل تعلم ان مصر سنة 2016 كان فيها 75 شركة تطوير عقاري وسنة 2025 بقوا 1910 شركة، يا ترى ليييه 🤔 لانه مجال بلا رقابة.

⬅️⬅️ ملحوظة : لقيت نفسي نسيت اكررها، الفقاعة العقارية غير قابلة للانفجار في مصر فمحدش يحلم بحوار انفجار الفقاعة دا، الكلام دا في أوروبا والدول المتقدمة مش عندنا.

أمريكا أعلنت عقوبات على بنك مصر فرع الإمارات 🇦🇪 بتهمة إنه Shadow Banking للنظام الحاكم في إيران وبناء عليه خلاص البنك (فرع الإمارات) محروم من الوصول للدولار والتعامل به.

*️⃣ محدش يقلق من القرار، البنك المركزي المصري طلع بيان قال إن القرار الأمريكي يخص فرع الإمارات فقط لا غير ولا بمتد للقطاع المصرفي المصري، وغالباً إن شاء الله هيتم عمل تفاهمات مع أمريكا

*️⃣ مهو مش ممكن ترامب يعلن إن هيكون في عقوبات صارمة ضد مساعدي إيران ويسيبوا الكوكب كله ويقرروا يدبحوا القطة للعالم بواسطة بنك مصر الإمارات 😂 ما في عشروميت شركة وبنك با عم هو ايه الغلاسة دي.

بحلم بيوم الدولة تعمل فيه عقد موحد لشركات التطوير العقاري.

*️⃣ ميكونش العقد حق للمطور ويخليه أشبه بعقود الإذعان زي حالتنا، المطور هو اللي حدد من دماغه الغرامة عالمشتري لو تأخر في الأقساط، وحدد من دماغه الغرامة على نفسه لو تأخر في التسليم... وتبقى الغرامة موحدة عالطرفين.

*️⃣ تخيل لو تم تطبيق قاعدة Milestone Payments، يعني المطور مثلاً ​10% مقدم تعاقد، و​10% لما المطور يخلص أعمال الحفر والأساسات، ​10% لما يخلص الهيكل الخرساني للمبنى، ​10% لما يخلص الواجهات والتشطيب الخارجي، والباقي بعد التسليم. بحيث لو المطور العقاري اتلكع في الشغل، تقف الدفعات ليه، ولو شيكات ميقدرش يصرفها لأن كل شيك مرتبط بتقدم البناء...

*️⃣ تتوقعوا دا ممكن يحصل في يوم؟ على فكرة دول مش من اختراعي، دول موجودين في دول بره، وهم ضمن فيديو ضخم في سلسلة فيديوهات بحضرها عن العالم والقطاع العقاري إللي ممكن يبقى قاطرة نمو أو خازوق للاقتصاديات... وإحنا عاوزينه يدعم الاقتصاد المصري.

بداية 2010 شهدت مصانع فوكسكون سلسلة من حالات الانتحار من العمال في مصانع أبل، كان العمال بيطلعوا فوق المبنى وينطوا... مع مرور الوقت وبحلول شهر مايو 2010 وصلت الحالات لـ9 حالات وآخرها كان عامل 19 سنة والسبب كان ظروف العمل الصعب.

*️⃣ فورا أبل تدخلت وأعلنت إنها على تواصل مع سلطات فوكسكون وإنها حثتهم على منع المزيد من الوفيات.

*️⃣ بعد يومين من اتصال أبل رصد الصحفيين عمال قاعدين يركبوا شباك مضادة للانتحار حوالين المباني زي بتاعة السيرك كده، بحيث العمال لو نطوا ينتحروا فيقع في الشباك ومش هيموت... يعني مش هنمنع سبب المشكلة لكن هنمنعك تنتحر بالشكل الدرامي اللي بيجيب دوشة دا...

*️⃣ لاحقا الضغوط والفضيحة على أبل دفعتها تفك الكيس وتدفع فلوس لفوكسكون لتحسين أوضاع العمال عشان سمعتها كشركة كيوت كتكوت متأثرة. وفوكسكون زودت العمالة 30% في يونيو ثم رفعت زودت الزيادة ل 66% في أكتوبر.

*️⃣ مش عارف ليه افتكرت القصة دي اللي عمرها 16 سنة وأنا بقرأ في صفحة وزارة الرياضة البيان عن هروب المصارع المصري في سلوفاكيا 🇸🇰 والبيان قال إن والد الشاب ماضي إقرار على مسؤوليته الشخصية عن عودة ابنه وعدم هروبه.

*️⃣ يعني الاتحاد والوزارة معترفين إن الظروف وحشة وإن دا هيدفع الناس عالهروب فنعمل إيه نعمل إيه 🤔 نركب شباك، أقصد نمضي أهل الشباب على إقرار مسؤوليتهم عن عيالهم... انتا فاكر هنصلح أوضاعهم مثلا استغفر الله العظيم... وجود الإقرار اعتراف، زي شباك فوكسكون بالظبط.

*️⃣ ربنا يوفقك يا ابني في مسيرتك في سلوفاكيا بس شوف دولة تديك فلوس أحسن من بتوع شرق أوروبا الفقراء (بالنسبة لأوروبا) دول.

*️⃣ إنت عايز نظام يعرف يقفش التهرب وغسيل الأموال والفساد، لكن مش متخيل إن نفس النظام لما يتعمل هيقدر يبص على دخلك وإنفاقك ويقوللك: معلش، الحساب هنا مش راكب. عايز كل حاجة Digital لما الـDigital يسهل عليك حياتك، لكن أول ما الـDigital يخلي المنظومة تعرف إنت دخلت كام وصرفت كام، تقول إيه ده هما مالهم؟

⬅️ فإحنا في الآخر عايزين حاجة مش موجودة. عايزين حياة الماضي ومزايا الكوسة، ومزايا المستقبل والنظام، الاتنين مع بعض، من غير عيوب أي واحد فيهم ومن غير ما ندفع أي cost.

*️⃣ عايزين النظام ييجي يشيل كل عيوب الفوضى، لكن يسيبلنا كل المزايا اللي إحنا خدناها من الفوضى. عايزين قوانين، بس الاستثناء بتاعنا يفضل. عايزين لوائح، بس لما اللائحة تضايقني أنا تبقى بيروقراطية. عايزين مكافحة واسطة، بس الواسطة بتاعتي تفضل شغالة.

*️⃣ وده مش معناه إن أي قانون الدولة تحطه يبقى صح، ولا إن أي ضريبة تبقى عادلة، ولا إن المواطن ما يحاسبش الدولة على خدماتها وإنفاقها. بالعكس حاسبها وناقشها واعترض على القانون الغلط والضريبة الغلط، لكن دي حتة تانية خالص، مش دي اللي أنا بتكلم فيها.

⬅️ اللي أنا بتكلم فيه إن إحنا كلنا بنقول إن إحنا عايزين النظام، لكن إحنا فعليا مش متخيلين تكلفة النظام.

*️⃣ النظام ليه تكلفة، اللوائح ليها تكلفة، القانون ليه تكلفة. ومش تكلفة فلوس بس، تكلفة إن حاجات كنت بتعرف تعملها مش هتعرف تعملها، وإن استثناءات كنت مستفيد منها هتختفي، وإن القانون اللي إنت عايزه يتطبق على الناس هيتطبق عليك إنت كمان.

*️⃣ فالسؤال في الآخر بسيط: هل إنت فعلا عايز النظام؟ هل إنت فعلا عايز اللوائح؟ هل إنت فعلا عايز القوانين؟

⬅️ لو قلت آه، تمام... هل إنت مستعد تدفع التكلفة؟

وأسيبك مع مقولة بحبها:

Be careful what you wish for, you just might get it.

طيب أقولكم حاجة هتزعلكم مني عشان ضد التيار شوية؟

*️⃣ على مدى سنين طويلة إحنا عشنا وسط قدر كبير من الفوضى وعدم النظام والفساد، ومع الوقت الفوضى دي مبقتش بالنسبالنا مجرد عيوب، بالعكس، بقى فيها مزايا إحنا نفسنا بنستفيد منها. عدم وجود النظام بيديك مساحة حركة أوسع، يخليك تتجنب شوية إجراءات، تخلص حاجات أسرع، تعدي حاجات المفروض ما تتعديش، ومع الوقت بتتعود على ده وبتعتبره الطبيعي.

*️⃣ بس بييجي وقت وبندفع تمن الفوضى دي، ولما نيجي ندفع التمن نقف نقول: إيه ده؟ فين النظام؟ إزاي ده حصل؟ وإحنا أصلا طول الوقت قاعدين نردد إن إحنا عايزين نظام، عايزين لوائح، عايزين قوانين، عايزين نبقى زي الدول المحترمة وكل حاجة ماشية بسيستم.

⬅️ بس السؤال بقى بجد، وعايزك تسأل نفسك السؤال ده بجد: هو إحنا فعلا عايزين كده؟ ولا إحنا عايزين بس مزايا النظام، من غير ما ندفع تمن النظام؟

*️⃣ يعني مثلا إنت رايح وسط البلد، الدنيا زحمة ومفيش ركنة، تلاقي سايس حاجز حتة ويطلعلك ركنة، تديله 20 جنيه ويركنك يا سيدي. أو إنت ساكن في منطقة زحمة، تنزل تحط طوبتين قدام البيت وتحجز الركنة بتاعتك. هو ده قانوني؟ إنت اشتريت الشارع؟ لأ، إنت اشتريت شقتك، إنما خارج جدران شقتك مالكش سلطة، مفيش حاجة اسمها دي الركنة بتاعتي عشان قدام بيتي، بس دي من الفوضى.

*️⃣ لو فيه سيستم حقيقي، السايس ده مش هيبقى موجود بالشكل ده، والطوبتين اللي تحت بيتك مش هيبقوا موجودين، والركنة مش هتفضل مستنياك. الركنات عليها ناس وإنت وحظك. والسايس اللي إنت بتشتمه عشان بيبلطج على الشارع، هو نفسه اللي إنت مبسوط بيه لما تنزل وسط البلد في عز الحر والزحمة ويطلعلك ركنة، ويمكن يسيبك صف تاني وياخد باله من العربية.

⬅️ يعني إنت هنا استفدت بالفلوس من الفوضى. فإنت عايز تشيل الفوضى، لكن الركنة اللي الفوضى كانت موفرهالك تفضل موجودة 😄

*️⃣ شوف بقى موضوع البطايق. إحنا متعودين إن صورة البطاقة بتمشي حاجات كتير جدا. جاي لك جواب من البنك، فيزا، شحنة، ورقة، أي حاجة، تسيب البطاقة مع حد يستلمهالك، ولا حتى تبعتله صورة البطاقة على واتساب وخلاص والدنيا بتمشي. ده مخالف للإجراءات أصلا، بس إحنا اتعودنا إنه بيمشي، وبصراحة ده مريحنا.

*️⃣ المشكلة إن نفس ثقافة إن صورة البطاقة "تمشي"، خلت ناس برضه تستخدم صورة البطاقة وتسجل خطوط تليفونات باسم ناس تانية، وتعمل معاملات باسم ناس تانية، والدنيا برضه "تمشي". وأول ما المشكلة تحصل نقول: إيه ده؟ فين النظام؟ إزاي حد قدر يعمل كده؟ حلو أوي، تعالى بقى نقفل الموضوع ده فعلا.

*️⃣ يا جدعان من النهاردة مفيش واحد يستخدم خط تليفون مش باسمه. هاه، تحبوا نعمل كده؟ هتطلعلك كمية ناس تقولك: لأ أصل ده خط مراتي، أصل ده باسم أبويا، أصل ده باسم أخويا، أصل دي أختي، أصل ده ابن عمي، أصل ده صاحبي، ووو؟

⬅️ من الآخر إنت عايز الفوضى، بس عايزها فوضى منظمة 😄 عايز مزايا التسيب تفضل موجودة، لكن الأضرار اللي ناتجة عن التسيب تتمنع. إنت مش هتعرف تعمل نظام يقولك: بص يا عم، أنا هسمح لك تعمل الحاجة الغلط عشان إنت بس حصريا، وباقي الناس لأ، أصل إنت نيتك كويسة، لكن همنع الشخص التاني عشان نيته وحشة.

*️⃣ نفس الحكاية في الهوية الرقمية. إحنا عايزين هوية رقمية، عايزين أعمل معاملاتي وأنا قاعد في البيت، أنقل ملكية، أأكد عملية، أخلص ورق، وكل حاجة بزرار. حلو أوي، أبسط أساس للمنظومة دي إن الدولة تعرف إن الشخص اللي بيأكد العملية ده هو إنت فعلا، وإن وسيلة التأكيد مرتبطة بيك إنت، طيب وإنت عندك ناس كتير جدا بتستخدم أرقام تليفونات مش باسمها، وفي ناس أصلا معندهاش رقم مسجل باسمها، هنعملها إزاي؟ تقول للناس لازم الخط يبقى باسمك، يقولك لأ، ليه التعقيد ده، ده قريبي؟ طب يا ابني إنت عايز الهوية الرقمية تشتغل إزاي؟ 😄

*️⃣ إنت عايز مزايا النظام الرقمي: أمان، سرعة، معاملات من البيت، تأكيد هوية، حماية من التزوير. وفي نفس الوقت عايز تفضل محتفظ بمزايا المنظومة القديمة، إن الخط يبقى باسم أي حد والدنيا ماشية. الاتنين مع بعض مش هيركبوا.

*️⃣ تعالى بقى نتكلم في أكتر حاجة مفيش تقريبا واحد على كوكب الأرض بيحبها: الضرايب 😄 كلنا بنقول نفس الجملة: يا جماعة إحنا عايزين الضرايب تتطبق على الكل، محدش يتهرب، محدش يخبي دخل، وكل واحد يدفع اللي عليه. جميل جدا. بس فيه مشكلة صغيرة: مين "الكل" اللي في دماغنا؟

*️⃣ الكل في بالنا هو الشركات الكبيرة، رجال الأعمال، التجار، الممثلين، الناس اللي فوق يعني 😄 طب المواطن العادي؟!! إيه ده، وأنا أدفع ضرايب ليه؟ طيب هو إنت عندك شقة ومأجرها وبتاخد إيجار كل شهر، فين الضرايب اللي إنت دفعتها على الدخل ده؟ إنت اشتغلت سمسار وجبت لواحد شقة وخدت منه شهر، فين الضرايب اللي إنت دفعتها على الشهر اللي أخدته؟

*️⃣ إنت مأجر شاليه في الساحل، فين الضرايب اللي اتدفعت على الإيجار ده؟ واحد جاب شوية حاجات من موقع صيني ولا من العتبة وقعد يبيعهم على جروبات فيسبوك ويكسب منهم، تقول له ده نشاط تجاري، يقولك إيه ده إزاي؟ ده أنا حاجات بسيطة، معاملاتي صغيرة قوي.

⬅️ فين الضرايب يا برنس؟ 😄 إحنا عايزين الضرايب تتطبق على "الكل"، بس الكل هنا معناها الناس التانية، مش أنا.

*️⃣ طب يا سلام، التاجر الكبير يقسم شغله عشر شركات صغيرة، وكل واحدة تقول أنا معاملاتي صغيرة. يعني في الآخر لازم يبقى فيه قواعد، والقواعد مش هتتبني على إن كل واحد شايف نفسه صغير أو إن معاملته دي مش مهمة أو إنه ما كانش ناوي أصلا يعمل نشاط.

*️⃣ وطبعًا أنا عارف إن فيه حد هيقوللي: بس يا محمد، أنا ما باخدش خدمات مقابل الضرايب دي، يبقى أنا أدفعها ليه أصلا؟ آه، هنا بقى فيه مشكلة جوهرية في فهم الضريبة نفسها. الضريبة مش تمن خدمة بتشتريها من الدولة، يعني الموضوع مش: السلام عليكم، أنا دفعت السنة دي 20 ألف جنيه ضرايب، يلا وروني بقى الخدمات اللي أنا أخدتها قصاد الـ20 ألف جنيه 😄

*️⃣ الضرايب من مظاهر إن الدولة عندها سلطة على المساحة اللي بتحكمها. ارجع 500 سنة لورا، ارجع 3000 سنة لورا، هتلاقي حاكم أو دولة بتحكم مساحة من الأرض، وبتفرض على الناس اللي عايشة وبتعمل نشاط جواها ضرايب أو جباية بشكل أو بآخر. الدولة دي بقى كويسة ولا وحشة، دي حكاية تانية.

*️⃣ دولة تستخدم الفلوس في طرق وري ومرافق وخدمات، ودولة تانية تلمها لصالح الإمبراطور، ودولة تالتة تعمل شوية من ده وشوية من ده. لكن الضريبة عمرها ما كانت فاتورة بتقول إنت دفعت 20 ألف، يبقى لازم تاخد 20 ألف خدمات بنفسك.

*️⃣ في الدول الحديثة بقى، ومع الديمقراطية والمحاسبة، المواطن بيقول للدولة: تمام، إنت خدتي مني الضريبة، معلش بقى وريني صرفتيها في إيه، وعايز تعليم وصحة وطرق وخدمات، وعايز أحاسبك لو صرفتيها غلط. لكن برضه مفيش علاقة واحد لواحد بين اللي إنت دفعته وبين الخدمة اللي وصلتلك إنت شخصيا.

*️⃣ ممكن واحد في أسوان يدفع ضرايب، والدولة السنة دي تبني كباري في القاهرة. الراجل في أسوان مش هيقول أنا ما اتبناش كوبري تحت بيتي السنة دي، رجعولي ضرايبي 😄 ومن حقه طبعا يسأل الدولة: ليه صرفتي هنا وما صرفتيش هنا؟ وهل التوزيع عادل؟ وهل أولوياتك صح؟ لكن دي خناقة مختلفة. لكن في النهاية يدفع.

⬅️ من حقك تحاسب الدولة على الضرايب، لكن مش معنى إن الخدمة اللي إنت شخصيا شايفها أقل من اللي دفعته إن الضريبة نفسها تبقى اختيارية.

*️⃣ ونفس الحكاية في الواسطة والمحسوبية. إحنا كلنا عايزين مكافحة الواسطة، عايزين محدش يدخل حد شغل عشان يعرف فلان، ولا حد يخلص ورقة عشان يعرف فلان، ولا حد ياخد دور حد. بس ابنك عايز يتنقل مدرسة؟ طب نشوف مين يعرف مين. الورقة هتاخد أسبوعين؟ كلم خالتك يمكن تعرف واحد يخليها 24 ساعة.

*️⃣ الواد عايز شغل؟ شوف عمه يعرف حد في الشركة. الطلب اترفض؟ طب نشوف مين يكلم مين. يعني إحنا عايزين نقضي على الواسطة، بس بعد ما نخلص طلبنا بالواسطة الأول 😄 لما واحد يخلص لغيري حاجة يبقى البلد كوسة، لما يخلصهالي أنا يبقى راجل خدوم وابن ناس.

⬅️ طب إنت عايز إيه بالظبط؟

*️⃣ أقولك حاجة، حتى في المدفوعات الرقمية نفس العقلية. تلاقي محل حاطط ماكينة فيزا، ييجي العميل يدفع يقوله هزود عليك 2%. تقوله طب ما تقول للناس مفيش فيزا أصلا. يقولك لأ، ما هم بيدفعوا الزيادة وبيشتروا. طب لو قلتله مفيش فيزا؟ يقولك فيه عميل مش هيشتري وهيمشي.

*️⃣ آه، يعني إنت لولا ماكينة الفيزا دي كان فيه عميل ممكن يمشي؟ آه. يبقى إنت استفدت من وجود ماكينة الفيزا؟ آه. بس مش عايز تدفع رسوم الاستفادة، اللي هي عمولة الفيزا. الماكينة جابتلك عميل كان ممكن ما يشتريش من عندك أصلا، لكن تكلفة الميزة دي إنت مش عايز تدفعها.

*️⃣ أنا مثلا أدخل محطة بنزين أقوله حط بألف جنيه، لو قالي الفيزا مش شغالة ممكن أقوله خلاص حط بـ200 جنيه. المحطة هنا خسرت بيع الـ800 جنيه الباقيين، مش عشان أنا ما كنتش محتاج بنزين، لكن عشان وسيلة الدفع اللي أنا عايزها مش موجودة.

*️⃣ أدخل سوبر ماركت وأشتري حاجات بـ5000 جنيه، أوصل للكاشير يقوللي الفيزا مش شغالة، ممكن جدا أسيب الحاجة وأمشي. صاحب السوبر ماركت كان ممكن يدفع مثلا 1.6% على العملية، يعني حوالي 80 جنيه، لكنه عشان يوفر الـ80 جنيه ممكن يخسر العملية كلها، وكان ممكن مثلا يكون مكسبه منها 500 جنيه.

⬅️ وهي دي العقلية بتاعتنا: إحنا عايزين الاستفادة من غير ما ندفع التمن. عايزين الميزة، لكن عايزينها مجانية.

*️⃣ ونفسها في فكرة النظام والرقمنة. إحنا عايزين الدولة تعمل سيستم، وكل حاجة تبقى Digital ومربوطة ببعضها. جميل جدا. طب خد بالك بقى إن السيستم ده ممكن يتقفشك بيه إنت كمان.

*️⃣ إنت بتقول للدولة إن دخلك السنوي كله 100 ألف جنيه، وفي نفس السنة اشتريت عربية، وخدت مراتك وعيالك وسافرت أسبوعين برا مصر، وروحت عمرة، وبتدفع مصاريف مدارس للعيال 300 ألف جنيه، وبتصرف وتصرف وتصرف. طب يا ابني الفلوس دي جات منين؟ مهو السيستم لو موجود في الدولة هيقفشك 😄

قبل يومين في بودكاست جديد نزل وهو ليه وضع خاص شويتين وغريب شوية

كلموني يوم الثلاثاء الماضي بتوع بودكاست بترولي (سعودي) اني اطلغ معاهم يوم الأربعاء مباشرة، اليوم كان مضغوط بين كشف عند دكتور صباحا ثم ميتنج مساءا فصورت بينهم


وسبحان الله أسرع بودكاست نزل، دا في بودكاست تاني مصوره مع حد بقالي شهر+ ولسه منزلش


فشوفوا البودكاست ولو حلو تمام ولو مش حلو فمعلش بقى راعوا الظروف الزمنية وغير الزمنية اللي كانت محيطة بالتصوير

https://youtu.be/g4Mi2ABvF6A?si=MHV-b22K_9bhKFwT

لا بجد يا جماعة، الناس بقت بتتخانق مع دبان وشها.

*️⃣ أنا رحت السنترال النهاردة (WE) عشان أستلم جهاز الـONT بتاع الفايبر. مطولتش في السنترال، قعدت نص ساعة تقريباً، لكن شفت خناقتين أنا بعتبرهم من أغرب الخناقات اللي قابلتها مع خدمة العملاء. يعني عادي بنشوف خناقات كتير، لكن مش بالشكل ده. اللي حصل النهاردة كان غريب، وهقولكم ليه.

*️⃣ الخناقة الأولى كانت بعيدة شوية، أنا ما سمعتش إيه ولا عارف أبعادها، بس أنا فجأة سمعت الموظف بيقول للعميل: والله يا فندم خمسة جنيه. فالعميل رد عليه: لا ما أنا شحنتها. فالموظف بيقوله: يا فندم لسه فاضل خمسة جنيه. أنا الكلام ده كان بيوصلي طراطيش لأني واقف بعيد ومش متابع، بس قعدوا يتناقشوا شوية وفيه حلفان، والله ما يحصل ومش عارف إيه، حوالين الخمسة جنيه.

*️⃣ الخناقة التانية بقى هي مثال لحد جاي يتخانق مع دبان وشه. أنا برضه قاعد في شباك تاني سامع العميل بيقول للموظف: دي بطاقتي ورقم بطاقتي ده ولا مش رقم بطاقتي؟ ورقم بطاقة والدي ولا مش ده رقم بطاقة والدي؟ وده ختم النسر ولا مش ختم النسر؟ ومش عارف إيه. فالفضول خدني: إيه الخناقة دي؟ أنا بحب قوي ختم النسر والخناقات بتاعت ختم النسر دي 😂 فحاولت أركز هما بيتخانقوا على إيه وكمان هما كان قدامي مباشرة فحاضر كل شيء.

*️⃣ لقيت الموظف بيقوله: يا فندم فين أصل الورق؟ فالعميل قاله: محدش قال لي أجيب أصل الورق. فالموظف رد عليه وقاله: يا فندم أي ورق لازم يكون الأصول بتاعته. فالعميل قاله: هو أنتوا بتشتغلوا في قسم واحد ولا قسمين؟ زميل حضرتك امبارح قالي هات إعلام الوراثة، مقالش هاتل أصل إعلام الوراثة.

*️⃣ المدير بتاع الموظف جه وقاله: إيه المشكلة يا فندم؟ الراجل برضه شرح له النقطة. وللأمانة أسلوب الموظف كان هادي، وأسلوب المدير كان هادي، والعميل هو اللي جاي يتخانق. في حد كده تحس إنه صاحي الصبح: أنا جاي النهاردة أتخانق وهتفهم ليه وصفت كده لما تكمل. فالخلاصة المدير قال للموظف: طيب خلاص ماشي، صورة صورة. فين يا فندم شهادة الوفاة؟ فالعميل قاله: إعلام الوراثة يغني عن شهادة الوفاة قانوناً.

*️⃣ فالمدير قاله: يا فندم أنا ماليش علاقة بـ«قانوناً» دي، أنا الشؤون القانونية عندي طالبة مننا في رفع الورق شهادة وفاة وإعلام وراثة. العميل قاله: لا، إعلام الوراثة اللي معاك يغني عن شهادة الوفاة. محدش يطلع له اعلام وراثة وهو حي (كلام منطقي). فالمدير قاله: يا فندم أنا مالي؟ أنا محتاج شهادة الوفاة. فالعميل قاله: هل عندك ورقة مختومة من جهاز تنظيم الاتصالات تفيد إن إحنا في الإجراء ده لازم نجيب شهادة الوفاة مع إعلام الوراثة ويكونوا أصل؟ فقاله: يا فندم أنا الشؤون القانونية عندي هي اللي بتنزل لي الورق المطلوب.

*️⃣ فالعميل قاله: طالما أنت معندكش ورقة بتقول كده، يبقى مع احترامي ليك أنت ما تعرفش حاجة، يبقى متتكلمش. أنا بقى توقعت المدير يتنرفز ويتعامل وتقلب خناقة، لكن المدير بمنتهى الهدوء قاله: إحنا كنا عايزين نرفع لحضرتك الورق بحيث الإجراء يتم على طول. يا فلان، ارفع له الورق زي ما هو مديهولك. هم بقى في الإدارة يقبلوا الإجراء أو يرفضوه، مش بتاعتنا. أصل إحنا منعرفش حاجة ومبنفهمش حاجة.

*️⃣ فأنا قلت خلاص الموضوع خلص، لكن العميل قرر يعلي، وراح يقول لهم: خليهم يرفضوا الورق ده وأنا هتصل بالشرطة أجيبهم وأعمل محضر إثبات حالة وأعمل لكم قضية. فالمدير قاله: يا فندم تعمل إثبات حالة لإيه؟ لأن الورق مرفوض؟ طب ما يا فندم الشرطة هتتواصل مع الشؤون القانونية عندنا اللي هتقول الورق مش مرفوع سليم. عموماً يا فندم إحنا مبنفهمش حاجة ومبنعرفش حاجة. وراح قايل للموظف: ارفع يا ابني الورق خلينا نخلص. وبالفعل خلال دقيقة الموظف كان خلص كل حاجة.

*️⃣ هنا بقى قعدت أفكر في الخناقتين. الخناقة الأولى على خمسة جنيه. طب ساعة الموظف بكام؟ وساعة العميل نفسه لو بيشتغل بكام؟ ووقت كل الناس اللي قاعدة في الدور ومستنية نفس الموظف ده بكام؟ أنا واثق إن الوقت اللي ضاع في النقاش أغلى من الخمسة جنيه نفسها. خمسة جنيه إحنا ما بندهاش دلوقتي للشحات في الشارع، ولو سايس ركن لك عربية واديته خمسة جنيه ممكن يتخانق معاك. ⬅️ عاملين زي فؤاد المهندس اللي صرفوا 400 جنيه علشان يحصل 44 مليم في أرض النفاق.

*️⃣ والتاني برضه معندوش مشكلة ييجي السنترال تاني، ويجيب الشرطة، ويعمل محضر، ويرفع قضية ومحامي، ويدخل في حوار طويل عريض، ولا إنه يروح يجيب أصل الورق وشهادة الوفاة. يا عم معندكش شهادة الوفاة؟ اطلبها من على النت وهتجيلك. لا، أنا هرفع قضية وأعمل حوار، لأن مش من حقكم تطلبوها طالما إعلام الوراثة يغني عنها قانوناً. يا عم خلص!

*️⃣ هو أنت عندك فراغ؟ أنت صاحي من الصبح بتعاني من الفراغ وعايز تتخانق؟ يا جدعان في إيه؟ الناس ما بتحسبش وقتها، وما بتحسبش حجم التوفير والهدر. زي واحد واقف في طابور العيش وبيشرب سجاير. أنا مش بتكلم هو مستحق للدعم ولا مش مستحق، بس ممكن يكون بيحرق في السجاير وهو واقف أكتر من فرق سعر العيش المدعوم عن غير المدعوم. أو واحد واقف يجيب التموين وبيشرب بيبسي وسجاير بـ 50 جنيه.

⬅️ الناس بتفكر إزاي؟ الناس ما بتحسبش. في حاجة غلط، فركوني بنفسي أيام الكلية ومعمل الكيمياء كان ساعات الاقي البيكر ولا الفلاسك هيقع وفيه مواد كيميائية اروح حاطط ايدي اجيبهم بيها... اضحي بإيدي في مواد كيميائية ولا اني أضحي بيكر كان وقتها ب 5 ولا 10 جنية (مصروفي كان 150 و 200 جنية). تفكيرنا غلط.

هو أنا ليه بقيت حاسس إن كلود بقى بيكسل يشتغل🤔 شغال على مشروع كده بيه فقالي ممكت تبعت لي Script اللي اسمه Config.gs... قولت له انتا رابط ب الدرايف ومعاك الصلاحيات تشوف كل شيء ما تشوفه بنفسك

*️⃣ فقالي اه تمام اعتذر أنا أقدر اشوفه ومش محتاج اسألك تبعته، تمام شوفته، ممكن بقى تبعت لي Index.html... قولت له يا عم ما انتا رابط وتقدر تشوفه 😂😂😂

*️⃣ دا مكسل يروح يشتغل وعاوز يشغلني، وهو اصلاً عنده صلاحيات يشوف السكربت لكن ميعدلش فيه فالدنيا أمان، انتا بتاخد مني 100 دولار عشان تشغلني عندك 😂😂

بقى كسولي قوي